khoon apna ho ya paraya ho,
nasl-e-adam ka khoon hai aakhir;
jang mashriq mein ho ya maghrib mein,
aman-e-alam ka khoon hai aakhir.
jang to khud hi ek maslaa hai,
jang kyaa maslon ka hal degi;
aag aur khoon aaj bakhshegi,
bhookh aur ehtiyaaj kal degi.
bartaree ke saboot ki khatir,
khoon bahana hi kya zaroori hai?
ghar ki tareeqiyan mitane ko,
ghar jalana hi kya zaroori hai?
Bam gharon par giren ke sarhad par,
Rooh-e-taameer zakhm khati hai;
Khet apne jalein ke auron ke,
Zeest faaqon mein tilmilati hai.
Tank aage badhen ke peeche haten,
Kokh dharti ki baanjh hoti hai;
Fateh ka jashn ho ke haar ka sog,
Zindagi mayyaton pe roti hai.
isliye ae shareef insaano,
jang taltee rahe to behtar hai;
aap aur ham sabhi ke aangan mein,
shama jalti rahe to behtar hai.